“Playtime 2015”-д дэлхийн алдартай хамтлагууд оролцоно

“Найрсаг Улаанбаатар” хөтөлбөрийн хүрээнд  зохиогдох “Playtime 2015” амьд хөгжмийн наадам ирэх зургадугаар сарын 27, 28-нд Гачуурт дахь “Монгол шилтгээн”-д болно. 

Нийслэлд орчин үеийн хөгжмийн соёлыг хөгжүүлэх, залууст амралт чөлөөт цагаа цэвэр агаарт, байгаль орчинд ээлтэй хэлбэрээр өнгөрүүлэх, дэлхийн болон Монголын шинэ шилдэг амьд хөгжмийн хамтлаг дуучдыг танилцуулах замаар залуусын хөгжмийн боловсролыг дээшлүүлэх зорилготой аж.

Улаанбаатар хотын захирагч Э.Бат-Үүл уг наадмыг дэмжиж, “Найрсаг Улаанбаатар хөтөлбөр”-ийн хүрээнд 40 сая төгрөг төсөвлөжээ.  

Нийслэлийн Соёл урлагийн газрын дарга Б.Батцэнгэл “Наадмыг олон улсын томоохон наадам болгоход нийслэлийн Засаг дарга ихээхэн дэмжсэн. Энэ наадамд гадаадын алдартай хамтлаг дуучдыг урьж оролцуулна. Цаашид Улаанбаатар хот бүс нутагтаа Ази тивдээ амьд хөгжмийн соёлоор тэргүүлэхийг хичээж байна” гэв.