“GUYS” хамтлагийн “Зүрх уучил” дууны шинэ клип гарчээ

Хайрын дуунуудаараа хамгийн алдартай хамтлагуудын нэг болох “GUYS”-ийн залуус сар шинийн баяраар “Best of Guys” аялан тоглолтоо Солонгос улсад эхлүүлж, тэнд ажиллаж, амьдарч, сурч байгаа элэг нэгт монголчууддаа дуу хоолойгоо хүргэсээр байна.Харин түүний өмнөхөн 2 дугаар сарын 14-ний Гэгээн хайрын баяраар дурлалт хосууд, фенүүддээ зориулан “Хайрын бүжиг” шоу тоглолтоо амжилттай толилуулсан юм. Энэ тоглолтынхоо үеэр тэд уран бүтээлийн бас нэгэн онцгой гэнэтийн бэлгийг задалсан нь "BEST of GUYS" шинэхэн цомог нь байлаа. Энэ цомогт хамтлагийнхаа 18 жилийн хугацаанд гаргасан нийт 4 цомгийн шилдгийн шилдэг 18 дуугаа багтаажээ. Мөн цомгийн цөөн хэдэн шинэ дуунуудын нэг болох “Зүрх уучил” дуундаа клип бүтээлгэж, үзэгчдийн хүртээл болгоод байна. Тус дууны үг, аяыг хамтлагийн дуучин А.Төгсбаяр зохиосон бөгөөд энэ нь “GUYS”-ийн 2015 оны уран бүтээлийн нээлт болж байгаа ажээ.

Мэдээж “GUYS” хайрын дууг хүний зүрхэнд хүртэл сайхан дуулж чаддаг. Зөвхөн дуулахаас гадна тэд мэргэжлийн жүжигчид учраас шинэхэн клипэндээ илүү бүтээлч сэтгэлгээгээр хандаж, жүжиглэх ур чадвараа тодотгосон үзүүштэй уран бүтээл туурвиж чаджээ.Дашрамд, “GUYS” хамтлагийн уран бүтээлүүдийг тун удахгүй “Apple”-ийн “iTunes” болон “Google”-ийн “PlayStore” цахим дэлгүүрүүдээс худалдан авах боломжтой.